कन्हैयाचा संघर्ष नजरेआड करुन त्याची जात शोधणारे जातीयवादी आहेत – आ.जिग्नेश मेवानी

  •  


एका अंगणवाडी कर्मचारी असलेल्या आईचा मुलगा जेव्हा लोकसभेच्या निवडणूकीत उमेदवार म्हणून उभा राहतो तेव्हा काही लोक त्याला भूमिहार सिद्ध करण्याचा आटापिटा करीत आहेत. कन्हैयाचा जन्म हा गरीब कुटुंबात झाला आणि त्याचे व त्याच्या भावा-बहिणीचे पालनपोषण त्याच्या आई-वडिलांनी मोठ्या कष्टाने केले. जर आपण कन्हैयाचे घर पहिले तर आपल्याला असे दिसून येईल कि सर्वसामान्य लोकांच्या घरासारखे त्याचे घर आहे. इतर भूमिहार परिवारांसारखे ते आपल्या पाल्यांचे शिक्षण हे फाइव्ह स्टार शाळेत करू शकतील अशी त्यांची स्थिती नाही. जर पाऊस आला तर त्यांच्या घरात १० ठिकाणी पाणी गळते. कोणी गंभीर आजारी पडलं तर त्याच्यासाठी इतर लोकांपुढे पैसे मागावे लागतील, अशी स्थिती कन्हैयाच्या परिवाराची आहे.

सौ.मिडीयाविजील

या देशातील जातिव्यवस्थेमुळे मागास जातीतील लोकांपेक्षा उच्च जातीतील लोकांना उत्पादनाचे खूप स्रोत उपलब्ध आहेत आणि त्याच बरोबर सामाजिक भांडवल देखील उपलब्ध असते. परंतु उच्च जातीत जन्माला आलेला प्रत्येक व्यक्ती हा जातीवादी (ब्राम्हणवादी) असतो हे मानणे हे अवैज्ञानिक तसेच दुसऱ्या प्रकारे जातीवाद आहे. जात ही एक मानसिक चेतना आहे, जातीचा त्या माणसाच्या जीन्सशी कुठलाही संबंध नाही. तसे मानणे हे अवैज्ञानिकच ठरेल. वैज्ञानिक आधारावर जर बघायला गेलो तर आपल्या वीर्यात असा कुठलाही घटक नाही कि जो असं दाखवेल की हा व्यक्ती या जातीतील आहे. याचा अर्थ असा की जर कोणी ब्राम्हण जातीत जन्माला आला तर तो ब्राम्हणवादी होत नाही. उदाहरणार्थ आपण पाहु शकतो की, या जातीवादाचा (ब्राह्मणवादाचा) खोलात जाऊन अभ्यास करणारे डॉ. बाबासाहेब आंबेडकर यांची पत्नी हि ब्राम्हण होती आणि बाबासाहेबांनी जेव्हा मनूस्मृती जाळली तेव्हा त्यांच्यासोबत ब्राम्हण होते. विशेष म्हणजे त्यांनी चालविलेल्या नियतकालिंकामध्ये लिहिणारे देखील ब्राम्हण होते. डॉ. बाबासाहेब आंबेडकर जेव्हा अहमदाबादला आले होते तेव्हा त्यांना काळे झेंडे दाखवणारे दलित होते.

डॉ. आंबेडकरांनी अगदी बरोबर असे म्हटले होते की जातीचा किडा कोणालाही सोडत नाही, त्याचे शिकार दलित आणि मागासवर्गीय देखील होऊ शकतात. या देशात कुठलाही व्यक्ती कुठलंही काम करो पण आधी त्याची जात शोधली जाते. हे असे होणं थांबले पाहिजे. ही सुशिक्षित लोकांना शोभणारी बाब नाही.

आपल्या देशात सध्या साथी कन्हैया सारख्या नेत्यांची खूप गरज आहे. कॉ. कन्हैया कुमार हा गरिबीतून वर आला असल्याने त्याला गरिबांची स्थिती कळते. तो गरीब दलित-मुसलमान असेल किंवा सर्वण असेल पण कॉ. कन्हैयाकुमार हा त्यांचा आवाज असेल. या याव्यतिरिक्त तुम्हाला त्याच्याविषयी ईर्ष्या असेल तर त्यावर काही उपचार नाही. हे मी माझ्या तीन वर्षांच्या अनुभवावरून म्हणतो आहे.

(जिग्नेश मेवानी गुजरात विधानसभा सदस्य आणि लोकप्रिय युवा नेते आहेत. ही टिप्पणी त्यांच्या फेसबुक पेजवरून घेतली आहे.)

अनुवाद – रोहित बागुल

  •  

Leave a Reply

You may have missed

%d bloggers like this: